侧田世界巡回演唱会WeTouchLive2015

侧田将於今年6月5、6日，喺红馆举行一连两场《侧田WeTouch Live2015世界巡回演唱会》。为配合演唱会「WeTouch」主题，日前侧田与一位女模影个唱海报，侧田被6呎女模嘅42吋长腿缠住，甚至胸压侧田，艳福无边！ 过往侧田演唱会海报，都只得佢一个人，今年将会系佢第5次踏红馆举行个唱，大会安排咗一位6呎女模，同侧田拍摄演唱会海报。虽然女模非常神秘，全程只见手脚唔见样，但身穿黑色透视装嘅佢，事业线若隐若现。 甫埋位，女模喺侧田身后「腿张开」，以42吋长腿搭住佢膊头，为摆靓甫士，佢右脚「斗零踭」就喺侧田两腿之间笃来笃去，最后「降落」喺侧田大髀上。 而另一款甫士，摄影师要求女模从后揽实侧田头部，并一拥入怀，而佢就配合「touch」主题，摸摸女模玉臂，女模坐得不稳，整个上身都要挨住侧田借力，两人几乎「零距离」，而侧田目不斜视亦不敢乱郁动，以免头顶「警钟」！ 侧田自爆对长腿情有独钟，佢笑言：「今日女Model真系好高，我喺隔离好似个细路仔，最紧要效果靓！人哋话男人对女人嘅喜好，随住自己年纪，越老越向下走，细个钟意睇样，老咗钟意睇脚，但我好早就钟意欣赏女仔嘅脚，我比较早熟，哈哈！」 以往拍海报都是只有自己一个人，今次不但有人陪，而且同女模有唔少身体接触，佢话：「今次演唱会主题系『WeTouch』，所以要多啲touching，其实人与人之间应该多啲掂吓对方，掂下你爱嘅人，唔好净系掂住自己部手机。我好多时同一班朋友食饭，都唔准大家玩手机，要专心倾偈，要有眼神接触。」 侧田更扬言要求自己个唱上，所有观众放下手机，专心欣赏佢演出。